Հայաստանի Հանրապետության էլեկտրոնային կառավարում | e-gov

Հայաստանի Հանրապետության Արմավիրի մարզում 2013 թվականի մայիսի 12-ի կարկտահարության հետևանքով մարզի համայնքների հողի հարկ և հողի վարձակալության վճար վճարող, ինչպես նաև ջրօգտագործողների ընկերությունների սպասարկման տարածքում ընդգրկված այդ համայնքներում ոռոգման ջուր օգտագործող ֆիզիկական և իրավաբանական անձանց պետական աջակցություն ցուցաբերելու նպատակով` «Հայաստանի Հանրապետության բյուջետային համակարգի մասին» Հայաստանի Հանրապետության օրենքի 19-րդ հոդվածի 3-րդ կետին համապատասխան՝ Հայաստանի Հանրապետության կառավարությունը ո ր ո շ ու մ է.
1. Հայաստանի Հանրապետության Արմավիրի մարզպետարանին Հայաստանի Հանրապետության 2013 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդից հատկացնել 214,040.0 հազ. դրամ (բյուջետային ծախսերի տնտեսագիտական դասակարգման «Այլ նպաստներ բյուջեից» հոդվածով), որից` առաջին կիսամյակում` 107,020,0 հազ. դրամ և ինն ամսում` 214,040.0 հազ. դրամ, այդ թվում`
1) 207,000.0 հազ. դրամը (որից` առաջին կիսամյակում` 103,500,0 հազ. դրամ և ինն ամսում` 207,000.0 հազ. դրամ) սույն որոշման N 1 հավելվածում նշված համայնքների վարչական տարածքում գտնվող գյուղատնտեսական նշանակության հողատարածքների (ներառյալ բնակավայրերում բնակշինարարության համար հատկացված՝ տնամերձ և այգեգործական (ամառանոցային) հողամասերի) հողի հարկի և համայնքի սեփականություն համարվող, ինչպես նաև համայնքի վարչական տարածքում գտնվող պետական սեփականություն համարվող գյուղատնտեսական նշանակության հողերի վարձավճարների 2013 թվականի համար հաշվարկված` համայնքի բյուջե վճարման ենթակա տարեկան գումարներն այդ վճարները կատարող ֆիզիկական և իրավաբանական անձանց անունից, նրանց փոխարեն համապատասխան համայնքի բյուջե վճարելու նպատակով.
2) 7,040.0 հազ. դրամը (որից` առաջին կիսամյակում` 3,520.0 հազ. դրամ և ինն ամսում` 7,040.0 հազ. դրամ) Արմավիր և Հայկավան գյուղական համայնքների կարկտահարված տարածքներում օգտագործվող ոռոգման ջրի արժեքն այն վճարող ֆիզիկական և իրավաբանական անձանց անունից, նրանց փոխարեն համապատասխան համայնքի բյուջե վճարելու նպատակով, այդ թվում` Արմավիր համայնքի բյուջե 4,500.0 հազ. դրամ (որից` առաջին կիսամյակում` 2,250.0 հազ. դրամ և ինն ամսում` 4,500.0 հազ. դրամ), Հայկավան համայնքի բյուջե` 2,540.0 հազ. դրամ (որից` առաջին կիսամյակում` 1,270.0 հազ. դրամ և ինն ամսում` 2,540.0 հազ. դրամ):
2. Ջրօգտագործողների ընկերությունների սպասարկման տարածքում ընդգրկված համայնքներում ֆիզիկական և իրավաբանական անձանց կողմից օգտագործվող ոռոգման ջրի դիմաց 2013 թվականի համար վարձավճարները փոխհատուցելու նպատակով Հայաստանի Հանրապետության տարածքային կառավարման նախարարության ջրային տնտեսության պետական կոմիտեին` համաձայն սույն որոշման N 2 հավելվածի, հատկացնել 650,102.0 հազ. դրամ` Հայաստանի Հանրապետության 2013 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդի հաշվին (բյուջետային ծախսերի տնտեսագիտական դասակարգման «Սուբսիդիաներ ոչ ֆինանսական պետական կազմակերպություններին» հոդվածով), որից` առաջին կիսամյակում` 325,051.0 հազ. դրամ և ինն ամսում` 650,102.0 հազ. դրամ:
3. Հայաստանի Հանրապետության Արմավիրի մարզպետին՝
1) ապահովել սույն որոշման N 1 հավելվածում ընդգրկված համայնքների վարչական տարածքում գտնվող գյուղատնտեսական նշանակության հողատարածքների (ներառյալ բնակավայրերում բնակշինարարության համար հատկացված՝ տնամերձ և այգեգործական (ամառանոցային) հողամասերի) հողի հարկի և համայնքի սեփականություն համարվող, ինչպես նաև համայնքի վարչական տարածքում գտնվող պետական սեփականություն համարվող գյուղատնտեսական նշանակության հողերի վարձավճարների գծով սույն որոշման NN 3, 5 հավելվածներով սահմանված ձևով համապատասխան ցանկերի կազմման, համայնքների ավագանիների կողմից հաստատման և սույն որոշումը հաստատվելուց հետո մեկ ամսվա ընթացքում դրանք համայնքների ղեկավարների կողմից Հայաստանի Հանրապետության Արմավիրի մարզպետարան ներկայացնելու գործընթացը.
2) սույն որոշման 1-ին կետով հողի հարկի գծով մարզպետարանին տրամադրված գումարները փոխանցել սույն որոշման N 1 հավելվածով սահմանված համայնքների բյուջեներ` յուրաքանչյուր համայնքի համար միասնական գանձապետական հաշվի եկամտային մասում բացված` համայնքի վարչական տարածքում գտնվող գյուղատնտեսական նշանակության համար հողի հարկի գծով մուտքերի հաշվառման գործող հաշվեհամարին` համաձայն համայնքի ավագանու կողմից հաստատված և համայնքի ղեկավարի կողմից սույն որոշման N 3 հավելվածով սահմանված ձևով ներկայացված ցանկերի.
3) առաջարկել համայնքների ղեկավարներին սույն որոշման 1-ին կետով հողի հարկի գծով հատկացված գումարներն ստանալուց հետո մեկ ամսվա ընթացքում հողի հարկ և գույքահարկ վճարողների հաշվառման ու հողի հարկի և գույքահարկի հաշվարկման ավտոմատացված տեղեկատվական համակարգի միջոցով ապահովել սույն որոշմամբ ընդգրկված անձանց հողի հարկի վճարումների մուտքագրումը.
4) սույն որոշման 1-ին կետով հողի վարձավճարների գծով մարզպետարանին տրամադրված գումարները փոխանցել սույն որոշման N 1 հավելվածով սահմանված համայնքների բյուջեներ` յուրաքանչյուր համայնքի համար միասնական գանձապետական հաշվի եկամտային մասում բացված` համայնքի սեփականություն համարվող, ինչպես նաև համայնքի վարչական տարածքում գտնվող պետական սեփականություն համարվող գյուղատնտեսական նշանակության հողերի վարձակալության և օգտագործման դիմաց գանձվող վարձավճարների գծով մուտքերի հաշվառման գործող հաշվեհամարին` համաձայն համայնքի ավագանու կողմից հաստատված և համայնքի ղեկավարի կողմից սույն որոշման N 5 հավելվածով սահմանված ձևով ներկայացված ցանկերի.
5) ապահովել համայնքների ղեկավարների կողմից սույն որոշման N 6 հավելվածով սահմանված ձևով ոռոգման ջուր օգտագործող ֆիզիկական և իրավաբանական անձանց ցուցակների կազմման և Հայաստանի Հանրապետության Արմավիրի մարզպետարան ներկայացման գործընթացը և դրանց հիման վրա սույն որոշման 1-ին կետի 2-րդ ենթակետով սահմանված գումարների փոխանցումն Արմավիր և Հայկավան գյուղական համայնքների բյուջեներ:
4. Հայաստանի Հանրապետության տարածքային կառավարման նախարարության ջրային տնտեսության պետական կոմիտեի նախագահին՝
1) ապահովել սույն որոշման N 2 հավելվածում ընդգրկված համայնքներն սպասարկող ջրօգտագործողների ընկերությունների կողմից սույն որոշման N 4 հավելվածով սահմանված ձևով ոռոգման ջուր օգտագործող անձանց ցուցակների կազմման և սույն որոշումը հաստատվելուց հետո մեկ ամսվա ընթացքում Հայաստանի Հանրապետության տարածքային կառավարման նախարարության ջրային տնտեսության պետական կոմիտե նշված ցուցակները ներկայացնելու գործընթացը.
2) սույն որոշման 2-րդ կետով տրամադրված գումարները որոշման N 2 հավելվածի համաձայն փոխանցել համապատասխան համայնքներն սպասարկող ջրօգտագործողների ընկերությունների բանկային հաշիվներին.
3) ապահովել սույն որոշման N 2 հավելվածում ընդգրկված համայնքներն սպասարկող ջրօգտագործողների ընկերությունների կողմից, սույն որոշման 2-րդ կետի համաձայն` տրամադրված գումարներն ստանալուց հետո մեկ ամսվա ընթացքում սույն կետի 1-ին ենթակետում նշված ցուցակներով ներկայացված անձանց կողմից օգտագործված ոռոգման ջրի դիմաց վարձավճարների մուտքագրումները:
5. Սույն որոշման 1-ին կետով սահմանված գումարները բաշխելու նկատմամբ վերահսկողությունը դնել Հայաստանի Հանրապետության Արմավիրի մարզպետի վրա:
6. Սույն որոշման 2-րդ կետով նախատեսված օգտագործված ոռոգման ջրի դիմաց ֆիզիկական և իրավաբանական անձանց վարձավճարները փոխհատուցելու մասով վերահսկողությունը դնել Հայաստանի Հանրապետության տարածքային կառավարման նախարարության ջրային տնտեսության պետական կոմիտեի նախագահի վրա:
7. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հավելված