2 Հունիսի 2016, 581 - Ա
ԱՆՀԱՏՈՒՅՑ ՕԳՏԱԳՈՐԾՄԱՆ ԻՐԱՎՈՒՆՔՈՎ ԱՆՇԱՐԺ ԳՈՒՅՔ ՏՐԱՄԱԴՐԵԼՈՒ ՄԱՍԻՆ
Հիմք ընդունելով Հայաստանի Հանրապետության քաղաքացիական օրենսգրքի 685-րդ, 688-րդ հոդվածները, «Պետական ոչ առևտրային կազմակերպությունների մասին» Հայաստանի Հանրապետության օրենքի 5-րդ հոդվածը և Հայաստանի Հանրապետության կառավարության 2011 թվականի փետրվարի 17-ի N 304-Ն որոշման 1-ին կետով հաստատված կարգի 3-րդ կետի 3-րդ ենթակետը, 5-րդ և 6.2 -րդ կետերը` Հայաստանի Հանրապետության կառավարությունը ո ր ո շ ու մ է.
1. Հայաստանի Հանրապետության Լոռու մարզի Վանաձոր քաղաքի Ներսիսյան փողոցի N 1 ա հասցեում գտնվող` պետական սեփականություն հանդիսացող 13 750 000 դրամ շուկայական արժեքով 266.05 քառ. մետր մակերեսով միահարկ, փայտաշեն մասնաշենքը (այսուհետ` անշարժ գույք) հետ վերցնել «Գ. Չաուշի անվան թիվ 24 միջնակարգ դպրոց» պետական ոչ առևտրային կազմակերպությունից և անհատույց օգտագործման իրավունքով 5 տարի ժամկետով տրամադրել «Առաքելություն Հայաստան» բարեգործական հասարակական կազմակերպությանը (այսուհետ` կազմակերպություն) (գտնվելու վայրը՝ 375026, քաղ. Երևան, Նժդեհի 42)՝ կազմակերպության կողմից ներկայացված ծրագրի իրականացման նպատակով:
2. Հայաստանի Հանրապետության կառավարությանն առընթեր պետական գույքի կառավարման վարչության պետին` սույն որոշումն ուժի մեջ մտնելուց հետո եռամսյա ժամկետում կազմակերպության հետ կնքել սույն որոշման 1-ին կետում նշված անշարժ գույքի անհատույց օգտագործման պայմանագիր (այսուհետ՝ պայմանագիր)՝ դրանում նախատեսելով, որ՝
1) կազմակերպության կողմից ներկայացված ծրագրի շրջանակներում կազմակերպության գործունեւթյան կազմակերպման համար անհրաժեշտ ֆինանսական ծախսերը, պայմանագիրն ուժի մեջ մտնելուց հետո 5 տարվա ընթացքում կազմելու են 84 667 000 դրամ՝ համաձայն ծրագրով ներկայացված պայմանների և ժամանակացույցի.
2) կազմակերպությունը սույն կետի 1-ին ենթակետով նախատեսված ծախսերի կատարումը հավաստող համապատասխան փաստաթղթերը ներկայացնում է Հայաստանի Հանրապետության կառավարությանն առընթեր պետական գույքի կառավարման վարչություն՝ յուրաքանչյուր տարի ժամկետի ավարտից հետո 15-օրյա ժամկետում.
3) կազմակերպության կողմից սույն որոշման 1-ին կետում նշված անշարժ գույքի ոչ նպատակային օգտագործման կամ սույն որոշման 2-րդ կետի 2-րդ ենթակետով սահմանված պարտավորությունների չկատարման կամ ոչ պատշաճ կատարման դեպքում պայմանագիրը ենթակա է լուծման.
4) պայմանագրի նոտարական վավերացման և պայմանագրից ծագող գույքային իրավունքների պետական գրանցման ծախսերը ենթակա են իրականացման կազմակերպության միջոցների հաշվին:
